चेंबूरमधील मैत्री पार्क एस.टी. स्टँड स्थलांतराच्या विरोधात सुरू असलेले आंदोलन अखेर रद्द करण्यात आले आहे. एमएमआरडीएकडून अधिकृत पत्र जारी करत याबाबत मोठा दिलासा देण्यात आला आहे.
एमएमआरडीएच्या परिवहन व दळणवळण विभागाने दिलेल्या पत्रानुसार, सध्या कार्यरत असलेला मैत्री पार्क एस.टी. बस थांबा हा छत्रपती शिवाजी महाराज चौक मेट्रो स्थानकाच्या २५० मीटर परिसरात येत असल्याने भविष्यात वाहतूक कोंडी होण्याची शक्यता लक्षात घेऊन बस स्टँड स्थलांतराचा प्रस्ताव ठेवण्यात आला होता.
मात्र, महाराष्ट्र राज्य मार्ग परिवहन महामंडळाच्या अधिकाऱ्यांसोबत चर्चा आणि प्रत्यक्ष स्थळ पाहणी केल्यानंतर प्रवाशांची गैरसोय टाळण्यासाठी हा स्थलांतर प्रस्ताव रद्द करण्याचा निर्णय घेण्यात आला आहे. एमएमआरडीएने स्पष्ट केले आहे की, सध्यास्थितीत मैत्री पार्क येथील एस.टी. बस थांबा स्थलांतरित करण्याचे कोणतेही नियोजन प्राधिकरणाकडे नाही.
या निर्णयामुळे स्थानिक नागरिक, प्रवासी आणि रिक्षाचालक संघटनांना मोठा दिलासा मिळाला असून, प्रस्तावित आंदोलनही आता रद्द करण्यात आले आहे. मैत्री पार्क परिसरातील नागरिकांनी या निर्णयाचे स्वागत करत प्रशासनाचे आभार मानले आहेत.
