कर्करुग्णांना वेळेवर उपचार, योग्य मार्गदर्शन आणि उपचार प्रक्रियेत सातत्यपूर्ण मदत मिळावी, या उद्देशाने टाटा मेमोरियल सेंटर (TMC) आणि ECHO India यांच्या संयुक्त विद्यमाने राबविण्यात आलेल्या Patient Navigation ECHO Program च्या पहिल्या बॅचचा पदवीदान सोहळा शनिवारी मुंबईत पार पडला. या कार्यक्रमाअंतर्गत महाराष्ट्रातील ७३ आरोग्यसेवा व्यावसायिकांना Patient Navigation चे विशेष प्रशिक्षण देण्यात आले.
राज्य सरकारच्या राष्ट्रीय आरोग्य अभियान (NHM) आणि बृहन्मुंबई महानगरपालिका (BMC) यांच्या सहकार्याने हा उपक्रम राबविण्यात आला. प्रशिक्षित आरोग्य कर्मचारी आता कर्करुग्णांना तपासण्या, उपचार, कागदपत्रांची पूर्तता, विविध विभागांमधील समन्वय आणि उपचार प्रक्रियेत सातत्य राखण्यासाठी मार्गदर्शन करतील.
टाटा मेमोरियल सेंटर हे देशातील अग्रगण्य कर्करोग उपचार, संशोधन आणि शिक्षण देणारे केंद्र असून, दरवर्षी लाखो रुग्ण येथे उपचार घेतात. देशभरात कर्करोग उपचाराची गुणवत्ता आणि समान मानके विकसित करण्यासाठी TMC ने National Cancer Grid (NCG) ची स्थापना केली आहे. या नेटवर्कमध्ये देशभरातील शेकडो कर्करोग उपचार संस्था सहभागी आहेत.
TMC च्या KEVAT Program अंतर्गत Patient Navigation क्षेत्रात व्यावसायिक प्रशिक्षण दिले जाते. या उपक्रमामुळे आतापर्यंत लाखो कर्करुग्णांना उपचार प्रक्रियेत मदत मिळाली असून, रुग्णांना वेळेवर उपचार मिळवून देण्यात महत्त्वाची भूमिका बजावली आहे.
ECHO India च्या Cancer Care Bharat Program अंतर्गत देशभरातील डॉक्टर, परिचारिका, सामाजिक कार्यकर्ते आणि इतर आरोग्य कर्मचाऱ्यांना ऑनलाइन प्रशिक्षण दिले जाते. या माध्यमातून दुर्गम भागांपर्यंत दर्जेदार कर्करोग सेवा पोहोचविण्याचा प्रयत्न केला जात आहे.
या पदवीदान सोहळ्यामुळे महाराष्ट्रात प्रशिक्षित Patient Navigators ची संख्या वाढणार असून, कर्करुग्णांना अधिक सुलभ, समन्वयित आणि प्रभावी आरोग्यसेवा उपलब्ध होण्यास मदत होणार आहे.
