सध्या महाराष्ट्रासह देशातील अनेक राज्यांमध्ये Special Intensive Revision (SIR) मोहीम सुरू आहे. या मोहिमेअंतर्गत Booth Level Officer (BLO) घराघरात जाऊन मतदारांची माहिती पडताळत आहेत. त्यामुळे अनेकांच्या मनात BLO नेमके कोण? ते घरी का येतात? असे प्रश्न निर्माण झाले आहेत.
BLO म्हणजे भारताच्या निवडणूक आयोगाकडून नियुक्त करण्यात आलेला अधिकारी. प्रत्येक मतदान केंद्रासाठी एका BLO ची नियुक्ती केली जाते. मतदार यादी अचूक, अद्ययावत आणि त्रुटीमुक्त ठेवणे ही त्यांची मुख्य जबाबदारी असते.
सध्या सुरू असलेल्या SIR मोहिमेत BLO नवीन मतदारांची नोंदणी, नाव, पत्ता किंवा इतर तपशीलांतील दुरुस्ती, तसेच मृत किंवा स्थलांतरित मतदारांची माहिती अद्ययावत करण्याचे काम करत आहेत. यासाठी आवश्यकतेनुसार आधार कार्ड, जन्म दाखला, दहावीचे प्रमाणपत्र, पासपोर्ट किंवा रहिवासी दाखला यांसारखी कागदपत्रे मागितली जाऊ शकतात. मात्र, प्रत्येक नागरिकाकडून सर्वच कागदपत्रे मागितली जातील, असे नाही.
BLO घरी आल्यास सर्वप्रथम त्यांचे अधिकृत ओळखपत्र तपासा. त्यानंतर मतदार यादीतील माहिती पडताळून आवश्यक कागदपत्रे उपलब्ध करून द्या. नागरिकांनी या प्रक्रियेला सहकार्य केल्यास मतदार यादी अधिक अचूक राहण्यास मदत होईल आणि भविष्यात मतदानाचा हक्क बजावताना कोणतीही अडचण येणार नाही.
