लोकमान्य टिळक सर्वसाधारण रुग्णालय, शीव येथील वैद्यकीय सोयी-सुविधांचा अतिरिक्त महानगरपालिका आयुक्त प्राजक्ता वर्मा-लवंगारे यांनी आढावा घेतला.
मुंबईसह मुंबईबाहेरील रुग्णांवरही येथे उपचार केले जात असून, रुग्णांना अधिक चांगल्या सुविधा देण्यासाठी डिजिटल हेल्थ रेकॉर्डची कार्यप्रणाली सुरू ठेवण्यावर भर दिला जात असल्याचे त्यांनी सांगितले.
डिजिटल रेकॉर्डमुळे रुग्णाचा पूर्वीचा उपचार आणि वैद्यकीय इतिहास डॉक्टरांना उपलब्ध होणार आहे. त्यामुळे पुन्हा नोंदणी किंवा कागदपत्रे सोबत आणण्याची गरज भासणार नाही. उपचार प्रक्रिया पेपरलेस करण्यासोबतच डिजिटल पेमेंटची सुविधाही उपलब्ध करून देण्याचा महापालिकेचा प्रयत्न असल्याचे प्राजक्ता वर्मा-लवंगारे यांनी स्पष्ट केले.
