स्वातंत्र्यवीर सावरकर यांच्या जयंतीनिमित्त सायन कोळीवाड्याचे आमदार कॅप्टन आर. तमिल सेल्वन यांच्या पुढाकारातून वीर सावरकर चरित्र चॅरिटेबल ट्रस्टच्या वतीने कौशल्य विकास अंतर्गत मोफत प्रशिक्षण केंद्राचे लोकार्पण आणि भव्य रोजगार मेळाव्याचे आयोजन करण्यात आले.
या कार्यक्रमाचे उद्घाटन मुंबईच्या महापौर रितू तावडे, मुंबई भाजप अध्यक्ष अमित साटम आणि कौशल्य विकास मंत्री मंगलप्रभात लोढा यांच्या प्रमुख उपस्थितीत करण्यात आले. मुंबईतील युवक-युवतींना रोजगाराच्या नव्या संधी उपलब्ध करून देण्याच्या उद्देशाने आयोजित या उपक्रमाला नागरिकांचा उत्स्फूर्त प्रतिसाद लाभला.
कार्यक्रमादरम्यान विविध क्षेत्रांतील मोफत कौशल्य प्रशिक्षण अभ्यासक्रमांची माहिती देण्यात आली. तसेच प्रशिक्षण पूर्ण केल्यानंतर युवकांना रोजगाराच्या संधी उपलब्ध करून देण्यासाठी विशेष प्रयत्न करण्यात येणार असल्याची माहिती यावेळी देण्यात आली.
यावेळी उपस्थित मान्यवरांनी युवकांनी कौशल्याधारित शिक्षणाचा लाभ घेऊन आत्मनिर्भर बनावे, असे आवाहन केले. तसेच गरजू आणि आर्थिकदृष्ट्या दुर्बल घटकांतील विद्यार्थ्यांना रोजगाराच्या मुख्य प्रवाहात आणण्यासाठी अशा उपक्रमांची आवश्यकता असल्याचे मत व्यक्त केले.
