सर्वसामान्य नागरिकांना वेळेवर आणि दर्जेदार आरोग्यसेवा उपलब्ध व्हावी, तसेच आजारांचे वेळीच निदान होऊन गरजू रुग्णांना योग्य उपचार मिळावेत, या उद्देशाने मंत्री छगन भुजबळ व माजी खासदार समीर भुजबळ यांच्या वाढदिवसाच्या औचित्य साधून येवला मतदारसंघातील सर्व गटांमध्ये मोफत आरोग्य तपासणी शिबिरे आयोजित करण्यात येणार आहेत. आरोग्यसेवेचा हा उपक्रम केवळ वाढदिवसापुरता मर्यादित न ठेवता नियमितपणे सुरू ठेवण्यास प्राधान्य देण्यात येणार आहे, असे प्रतिपादन डॉ. शेफाली भुजबळ यांनी केले.
माजी खासदार समीर भुजबळ व मंत्री छगन भुजबळ यांच्या वाढदिवसानिमित्त दुष्काळग्रस्त नागरिकांना मदत करण्यास प्राधान्य देण्याबरोबरच सर्वसामान्य नागरिकांना दर्जेदार आरोग्यसेवा उपलब्ध करून देण्याच्या उद्देशाने येवला मतदारसंघात विविध सामाजिक उपक्रम राबविण्यात येत आहेत. याच उपक्रमाचा एक भाग म्हणून भुजबळ ब्रिगेड येवला, मंत्री छगन भुजबळ यांचे वैद्यकीय मदत कक्ष, राष्ट्रवादी काँग्रेस पार्टी आणि एसएमबीटी रुग्णालय यांच्या संयुक्त विद्यमाने सर्वरोगनिदान शिबिरांचे आयोजन करण्यात आले आहे. येवला शहरातील शिबिराचे उद्घाटन डॉ. शेफाली भुजबळ यांच्या हस्ते करण्यात आले.
यावेळी डॉ. शेफाली भुजबळ यांनी आरोग्यसेवेचे महत्त्व अधोरेखित करत नागरिकांना वेळेवर आरोग्य तपासणी करून घेण्याचे आवाहन केले. अनेकदा दैनंदिन धावपळ, आर्थिक अडचणी किंवा आरोग्याविषयी पुरेशी जागरूकता नसल्यामुळे नागरिक नियमित तपासणी करून घेत नाहीत. परिणामी, काही आजारांचे निदान उशिरा होते. अशा परिस्थितीत मोफत आरोग्य तपासणी शिबिरे नागरिकांसाठी उपयुक्त ठरतात. या माध्यमातून आजारांचे वेळीच निदान होण्यास मदत होते आणि आवश्यकतेनुसार पुढील उपचार घेण्याबाबत मार्गदर्शन मिळू शकते, असे त्यांनी सांगितले.
त्या म्हणाल्या की, मंत्री छगन भुजबळ आणि माजी खासदार समीर भुजबळ यांच्या वाढदिवसानिमित्त केवळ औपचारिक कार्यक्रम न करता समाजोपयोगी उपक्रमांच्या माध्यमातून नागरिकांना मदत करण्याचा प्रयत्न करण्यात येत आहे. ग्रामीण आणि शहरी भागातील सर्वसामान्य नागरिकांना आरोग्यसेवा सहज उपलब्ध व्हावी, हा या शिबिरांमागील प्रमुख उद्देश आहे. येवला मतदारसंघातील सर्व गटांमध्ये मोफत आरोग्य तपासणी शिबिरे आयोजित करण्यात येणार असून, आरोग्यसेवेचा हा उपक्रम केवळ वाढदिवसापुरता मर्यादित न ठेवता नियमितपणे सुरू ठेवण्याचा मानस असल्याचे डॉ. शेफाली भुजबळ यांनी स्पष्ट केले.
आरोग्य ही प्रत्येक नागरिकाची मूलभूत गरज असून, आजारांचे वेळीच निदान आणि योग्य उपचार यांना विशेष महत्त्व आहे. त्यामुळे नागरिकांनी अशा शिबिरांचा लाभ घ्यावा आणि आपल्या आरोग्याबाबत जागरूक राहावे, असे आवाहनही यावेळी त्यांच्याकडून करण्यात आले.
या उद्घाटनप्रसंगी येवला नगराध्यक्ष राजेंद्र लोणारी, उपनगराध्यक्षा पुष्पा गायकवाड, गटनेते दीपक लोणारी, नगरसेविका पारुल गुजराथी, लक्ष्मीबाई साबळे, तृप्ती परदेशी, महेश काबरा, डॉ. चंद्रशेखर क्षत्रिय, डॉ. कमलेश पैठणकर, सचिन सोनवणे, पत्रकार मनोज पटेल, समन्वयक संतोष खैरनार, योगेश तक्ते, एसएमबीटी मेडिकलचे रवी भट, डॉ. देवाशीश इचे, डॉ. विक्रम कुलकर्णी, डॉ. रितू सपनार, डॉ. ऐश्वर्या चित्कार, डॉ. रेहा, डॉ. साक्षी कळमकर, डॉ. अजिंक्य पिंगळे, डॉ. शैलेश जिवाजी यांच्यासह विविध पदाधिकारी, कर्मचारी, कार्यकर्ते आणि नागरिक मोठ्या संख्येने उपस्थित होते.
मंत्री छगन भुजबळ आणि माजी खासदार समीर भुजबळ यांच्या वाढदिवसानिमित्त आयोजित या आरोग्यसेवा उपक्रमातून समाजातील गरजू नागरिकांना मदतीचा हात देण्यासोबतच आरोग्याविषयी जनजागृती करण्याचा प्रयत्न करण्यात येत आहे. मतदारसंघातील सर्व गटांमध्ये शिबिरांचे आयोजन करून अधिकाधिक नागरिकांपर्यंत आरोग्यसेवा पोहोचविण्यावर भर देण्यात येणार आहे.
